Кремль Путиннинг Донбассда «ҳарбий масалаларни ҳал этувчилар» ҳақидаги сўзларига аниқлик киритди
Россия президентининг матбуот котиби Дмитрий Песков Россия Донбассга ҳарбий мутахассисларни юбормаганлиги, у ерга Россиядан кўнгиллилар борганлигини маълум қилди. Бу ҳақда «РБК» хабар беради.
Журналистлар 18 декабрь, жума куни президентнинг матбуот котиби Дмитрий Песковдан Владимир Путиннинг Донбассда «ҳарбий масалаларни ҳал этувчи» россияликлар ҳақидаги сўзларига аниқлик киритишни, давлат раҳбари айнан нимани назарда тутганлигини сўради. Бу сўзларни президент кеча, 17 декабрь куни катта матбуот йиғилиши давомида айтиб ўтган эди.
«У ерда уруш кетаётган эди, одамлар у ерга жанг қилиш учун йўл олган, ҳарбий ҳаракатларда қатнашган. Мана шу ҳарбий соҳадир», — деди Песков.
Путин ушбу сўзлари билан россиялик ҳарбий мутахассислар эмас, кўнгиллиларни назарда тутганлигини аниқлаштириш бўйича саволга Песков тасдиқловчи жавоб берди.
