«Қозоғистон гўзали — 2015» танлови ғолиби 17 ёшли Алия Мергембаева ўз соврин жамғармасидан бир миллион тенгени хайрия учун сарфлаш ҳақида қарор қабул қилди. Бу ҳақда, «Новости-Казахстан» хабарига кўра, танлов ташкилотчилари маълум қилган.
«Қозоғистон гўзали — 2015» танловидаги ғалабадан сўнг, Мангистау туризм коллежининг 3-курс талабаси ҳисобланган актаулик Алия Мергембаева 5 миллион тенге миқдорида пул мукофоти соҳибига айланди.
«Онаси билан маслаҳатлашган қиз, бир миллион тенгени Актау, Остона ва Олмаотадаги учта меҳрибонлик уйига йўналтириш ва уларнинг ҳар бирида «фойдали соат» ўтказишга қарор қилди», — дейилади хабарда.
Хабар беришларича, Мергембаевлар оиласида беш нафар фарзанд бўлиб, Алиянинг бир акаси, икки укаси ва бир синглиси бор. Алиянинг онаси — Жонсулув Бекбўсинова техник-лаборант сифатида фаолият олиб боради.
«Алия — менинг ҳақиқий ёрдамчим. Йўқлигимда, уй ишларида мени тўла ўрнимни босади, болаларга қарайди, нонуштани ҳам, тушликни ҳам, кечки овқатни ҳам тайёрлайди, ўқиши ҳам жойида — фақат тўрт ва беш баҳога ўқийди. Кўп йиллардан бери волейбол ўйнайди. Албатта, биз ғалабани кутмагандик, бутун оиламиз билан бундан қувондик. У халқаро майдонда Қозоғистон шарафини ҳимоя қилганида ҳам уни қўллаб-қувватлаб турамиз», — деди Жонсулув Бекбўсинова.
Изоҳ (0)