Kreml Putinning Donbassda “harbiy masalalarni hal etuvchilar” haqidagi so‘zlariga aniqlik kiritdi
Rossiya prezidentining matbuot kotibi Dmitriy Peskov Rossiya Donbassga harbiy mutaxassislarni yubormaganligi, u yerga Rossiyadan ko‘ngillilar borganligini ma’lum qildi. Bu haqda “RBK” xabar beradi.
Jurnalistlar 18-dekabr, juma kuni prezidentning matbuot kotibi Dmitriy Peskovdan Vladimir Putinning Donbassda “harbiy masalalarni hal etuvchi” rossiyaliklar haqidagi so‘zlariga aniqlik kiritishni, davlat rahbari aynan nimani nazarda tutganligini so‘radi. Bu so‘zlarni prezident kecha, 17-dekabr kuni katta matbuot yig‘ilishi davomida aytib o‘tgan edi.
“U yerda urush ketayotgan edi, odamlar u yerga jang qilish uchun yo‘l olgan, harbiy harakatlarda qatnashgan. Mana shu harbiy sohadir”, — dedi Peskov.
Putin ushbu so‘zlari bilan rossiyalik harbiy mutaxassislar emas, ko‘ngillilarni nazarda tutganligini aniqlashtirish bo‘yicha savolga Peskov tasdiqlovchi javob berdi.
