Франция махсус хизматлари 2010 йилдан буён Парижнинг «Батаклан» концерт залида эҳтимолий теракт хавфи ҳақида маълумот олган. Бу ҳақда ўз манбаларига таяниб, Франциянинг Le Canard enchaine нашри маълум қилди, деб ёзади «Интерфакс».
Хавф ҳақидаги ахборот 2009 йил февралида Қоҳирадаги Франция лицейи ўқувчиларига қарши уюштирилган терактни текшириш чоғида юзага чиққан. Ўшанда франциялик терговчилар «Батаклан»га ҳужум ташкил қилишни режалаштирган бельгиялик радикал Фаруқ Аббос исм-шарифини аниқлаган.
2010 йилда Аббос ҳибсга олинган, бироқ етарлича далиллар бўлмагани туфайли, икки йилдан сўнг суд иши ёпилган. Шу билан бирга, Аббос ИШИДнинг Париждаги ҳужумларга алоқаси борлигини маълум қилган экстремист Фабьен Клен билан таниш бўлган.
Эслатиб ўтамиз, Парижда 13 ноябрь куни терактлар кетма-кетлиги содир этилиб, қўпорувчилик ҳаракатлари оқибатида 130 киши ҳалок бўлган, 352 киши яраланган эди.
Изоҳ (0)