Коинотни кузатиш учун жуда қулай манзил ҳисобланадиган Чилидаги Атакама саҳросида дунёдаги энг катта Улкан Магеллан телескопи (GMT) қурилиши бошланди. 11 ноябрь, чоршанба куни мамлакат президенти Мишель Бачелет унга биринчи тош қўйиш маросимида иштирок этди, дея хабар беради «ТАСС».
Телескопнинг бош кўзгуси диаметри 25,4 метрга тенг. Қурилма «Хаблл» коинот телескопидан ўн карра тиниқроқ тасвир олиш имконини беради. Телескоп 22 қаватли уй баландлигидаги гумбаз остида бўлади. Олимлар унинг ёрдамида Қуёш тизимидан ташқарида жойлашган самовий жисмлар ҳақида кўпроқ маълумот олиш, Ерга ўхшаш сайёраларни топиш ниятида.
2500 метр баландликда жойлашган астрономик қурилма 2021 йилда фойдаланишга топширилиши кўзда тутилган. Уни бунёд этишга 500 миллион доллардан зиёд маблағ сарфланади. Лойиҳада АҚШ, Австралия, Бразилия, Жанубий Корея ва Чили иштирок этмоқда.
Изоҳ (0)