«Газпром» энг йирик энергетика компаниялари рейтингининг биринчи ўнлигини тарк этди

Россиянинг «Газпром» компанияси дунёнинг энг йирик энергетика компаниялари рейтингининг биринчи ўнлигини тарк этди. 27 октябрь, сешанба куни чоп этилган Platts Top 250 Global Energy Company Rankings манбалари шундан далолат бермоқда, дея хабар беради «Корреспондент.net».

Жорий йилда «Газпром» ўтган йилги 4-ўриндан 43-ўринга тушиб қолган. Россия компанияларидан биринчи ўнликда фақат ўтган йилги олтинчи ўриндан 10-ўринга сурилган «Роснефть» қолди, холос. Мамлакатнинг бошқа энергетика компаниялари ҳам ўз мавқейини бой берган: улар қаторида «Лукойл» (11-ўриндан 13-ўринга), «Новатек» (55-ўриндан 133-ўринга) ва «Башнефть» (67-ўриндан 101-ўринга) компанияларини санаб ўтиш мумкин.

Рейтингда қаторасига 11 йил пешқадамликни сақлаб келаётган ExxonMobil (АҚШ) бошқарди. Иккинчи ва учинчи ўринларни тегишли равишда Chevron ва Royal Dutch Shell эгаллаган.

Platts дунёнинг энг йирик энергетика компаниялари рейтингини 2001 йилдан бери эълон қилиб келмоқда. Уни тузишда компаниялар даромади, фойдаси, активлари қиймати ҳамда корхоналар инвестиция қилган капитал келтирган фойда ҳисобга олинади.