Евроиттифоқ расмийлари санкциялар кучга киргани сабабли аввал экспорт қилиниши тақиқланган ракета ёнилғисининг гидразин, гептил ва монометилгидразин каби таркибий қисмларини Россияга чекланган миқдорда етказиб берилишига рухсат берди. Бу ҳақда «РБК» хабар бермоқда.
ЕИ Кенгаши томонидан эълон қилинган қарорда жорий этилган чекловчи чоралар Евроиттифоқ ёки унга аъзо давлатларнинг коинот дастурлари амалга оширилишига салбий таъсир кўрсатмаслиги лозим эканлиги таъкидланади. Шу муносабат билан Европа манфаатлари доирасида парвози амалга оширилаётган ракета ва сунъий йўлдошлар учирилиши учун зарур миқдордаги ёнилғи компонентлари етказиб берилишига истисно тариқасида рухсат берилди.
Масалан, гидразин ҳажми режалаштирилган парвозлар сонидан келиб чиқиб ҳисоб-китоб қилиниши ва ҳар бир учиш учун 800 килограммдан ошмаслиги лозим. Гидразин ва ундан ҳосил бўладиган ашёлар Россия ҳамда чет эл сунъий йўлдошларини орбитага олиб чиқадиган «Протон» ташувчи ракетаси ёнилғисида фойдаланилади. 2015 йили «Протон-М» ракеталари Inmarsat (Буюк Британия) алоқа операторининг икки сунъий йўлдошини орбитага олиб чиқди.