Мино водийсидаги фожиа қурбонлари сони 769 кишига етди
Макка яқинидаги Мино водийсида ҳаж амалларидан бирини бажариш чоғида юз берган тирбандлик натижасида ҳалок бўлганлар сони 769 кишига етди. Бу ҳақда Саудия Арабистони Соғлиқни сақлаш вазири Ҳолид ал Фалиҳ маълум қилди, деб хабар беради «Коммерсант.ru».
Сўнгги маълумотларга қараганда, ҳодиса натижасида жабрланганлар сони 934 кишини ташкил қилмоқда.
Эслатиб ўтамиз, тиқилинч ҳаж маросимларидан бири — шайтонга тош отиш вақтида рўй берган. Маросим вақтида 100 минглаб одамлар бир жойга тўпланиб қолган ва тартибсиз ҳаракат қилган.
Олдинроқ 24 сентябрь куни юз берган бахтсиз ҳодиса туфайли 717 киши ҳалок бўлгани, 800 дан ортиқ зиёратчи жабрлангани хабар қилинган эди.
Ўзбекистон Вазирлар Маҳкамаси ҳузуридаги Дин ишлари бўйича қўмита Ахборот хизмати Саудия Арабистонида ўзбекистонлик ҳожиларга хизмат кўрсатувчи ишчи гуруҳга таяниб, ҳодиса қурбонлари ва жабрланувчилари орасида Ўзбекистон фуқаролари йўқлигини маълум қилди.
Кейинроқ эса Ўзбекистон Республикаси Ташқи ишлар вазирлиги Мино водийсидаги фожиа оқибатида ўзбекистонлик зиёратчилар ҳалок бўлмаганини тасдиқлади.
