Латвия пойтахти Ригадаги мудофаа миллий академиясида НАТО қўмондонлик таркиби вакилларининг «Мустаҳкам чўққи — 2015» машғулоти бошланди. Уларда тузилмага аъзо 13 мамлакат, шунингдек, Финляндия ва Швециядан келган 24 нафар бригада генерал, генерал майор ва генерал-лейтенант қатнашмоқда. Бу ҳақда «ТАСС» хабар берди.
«Асосий мақсад — ҳарбий амалиётлар чоғида қарорлар қабул қилиш жараёнини такомиллаштириш. Машғулотлар НАТОнинг Брюсселдан келган экспертлари маърузаларини тинглаш ва хариталар билан амалий ишлаш тарзида олиб борилмоқда», — дея таъкидлаган Латвия мудофаа вазирлиги вакили Анете Гнезе. Машғулотлар 25 сентябргача давом этади.
Латвиядаги Адажи ҳарбий базасида НАТО қуруқликдаги қўшинларининг «Кумуш ўқ» деб номланган ҳарбий машқлари ҳам ўтказилмоқда. Уларда АҚШ, Дания, Канада, Буюк Британия ва Германиядан келган 2100 нафар аскар иштирок этмоқда.
Изоҳ (0)