10 долларлик купюрада Буюк Британия собиқ бош вазири Маргарет Тэтчер портрети пайдо бўлиши керак. Бундай фикрни Жеб Буш Республикачилар партиясидан АҚШ президентлигига даъвогарлар орасида бўлган дебат чоғида билдирди, деб ёзади The Guardian.
Бушнинг аниқлик киритишича, Тэтчер президент Рональд Рейганнинг энг содиқ тарафдорларидан бири бўлган. Арканзас собиқ губернатори Майк Хакаби ўн долларлик пулда ўз рафиқасининг, нейрожарроҳ Бен Карсон — онасининг, миллиардер Дональд Трамп эса қизи Иванканинг расми бўлиши керак деб ҳисоблайди.
Эслатиб ўтамиз, июнь ойида АҚШ молия вазирлиги АҚШ тарихида биринчи марта 10 долларлик купюрага аёл кишининг портрети туширилишини эълон қилган эди. Янги купюра 2020 йилда муомалага киритилади. Унинг кўриниши эса АҚШ молия вазири Жейкоб Лью айтишича, «Америка демократияси қадриятларини намойиш этади». У банкнотани айнан кимнинг расми безаб туришига аниқлик киритмади. Бунга жамоатчилик фикрини ҳисобга олган ҳолда қарор қилинади. Таклифлар ёз бўйи йиғилиб, натижалар йилнинг иккинчи ярмида маълум қилинади.
Изоҳ (0)