Олимлар кечки тановул инсон организми учун зарурлигини таъкидламоқда: уларнинг фикрича, калориялар тўпланиши ва тўлишиб кетишдан чўчиб, кечки таомдан воз кечиш фойдадан кўра кўпроқ зарар келтиради. Бу ҳақда «Сегодня.ua» хабар бермоқда.
«Организмни фақат тушлик билан тўйдириш амримаҳол, — дея ҳисоблайди таниқли украиналик парҳезшунос Борис Скачко. — Кечки соат олтидан сўнг таомланишдан воз кечиш ошқозон яраси ёки ўт пуфагида тош пайдо бўлишига олиб келиши мумкин. Бу жигар фаолиятсиз қолиши билан боғлиқ — у таомни қайта ишлаши шарт бўлмагани туфайли сафро сустлиги юзага келади ва бунинг оқибатида тошлар пайдо бўлиши мумкин. Кераксиз ошқозон соки бўш ошқозонга тушиб, унинг ташқи қатламини емириши оқибатида эса яра ҳосил бўлади».
Олдинроқ Сидней университети олимлари ўз тадқиқотлари натижасида кечки овқатнинг зарарли эканлиги ҳақидаги маълумотларни инкор этиб, бошоқлилар ва сабзавотларга кўпроқ ўрин берилган кечки таом организм томонидан енгил ўзлаштирилиши ва мияда асаб тизимини тинчлантириб, тезда уйқуга кетишга ёрдам берувчи серотонин («бахт» гармони) моддасининг кўпайишига олиб келишини исботлади. Украиналик олим ҳам кечки таом енгил, асосан, шўрвалар, балиқ ёки салатлардан иборат бўлиши мақсадга мувофиқ эканлигини таъкидлаган.
Изоҳ (0)