Жанубий Корея ва КХДР ажралиб қолган оилаларнинг учрашувига тайёргарлик кўриш бўйича дастлабки музокараларни 7 сентябрь куни ўтказишга келишиб олди. «РИА Новости» хабарига кўра, музокаралар санаси аввалроқ Жанубий Корея томонидан таклиф қилинган ва КХДР бунга рози бўлган.
Тайёргарлик учрашувлари КХДР ва Жанубий Кореянинг Қизил Хоч ташкилотлари иштирокида бўлиб ўтади.
1950—53 йиллардаги Корея уруши сабаб ажралиб қолган оилаларнинг учрашувлари 1980 йиллардан бошлаб ўтказиб келинади. Кейинчалик КХДРдаги Кимгансан курортида бундай учрашувлар учун Жанубий Корея кўмагида меҳмонхона ҳам қурилган.
Аввалроқ, икки мамлакат чегарасидаги қуролсизлантирилган ҳудуддаги қарама-қаршиликни тартибга солиш бўйича учрашувда томонлар муносабатларни яхшилаш устида ишлаш ва ажралиб қолган оилаларнинг учрашувларини қайта ташкил этиш бўйича келишиб олганди.
Дастлабки тахминларга кўра, ажралиб қолган оилаларнинг учрашуви 2015 йилнинг 27 сентябрь куни ўтказилади. Расмий маълумотларга кўра, биргина Жанубий Кореяга КХДРдаги қариндошлари билан кўришиш истагида бўлган 100 минг киши бор. Шимолда ҳам тахминан шунча одам Жанубий кореяликлар билан учрашиш ниятида.
Изоҳ (0)