2013 йил июнидан бери Москвада яшаётган АҚШ махсус хизматларининг собиқ ходими Эдвард Сноуден Норвегияга ташриф буюришдан бош тортди — бу ерда унга Бернстерне Бернсон номидаги мукофот топширилиши керак эди. The Guardian хабарига кўра, собиқ агент АҚШга экстрадиция қилиниши хавфи борлиги сабаб, шундай қарорга келган.
Ўз навбатида, тадбир ташкилотчилари Россия-Норвегия чегарасида рамзий маросимни ўтказиш таклифи билан чиқди, дея хабар бермоқда The Local. «Билишимча, чегарада бевосита кўришиш мумкин эмас. Бу ҳолатда биз совринни чегарада қолдирамиз, Сноуден эса Россия тарафдан келиб, уни олиб кетиши мумкин», — дея таклиф қилди Норвегия адабиёт ва фикр эркинлиги академияси президенти Хэге Ньют Нури.
Июль ойида Сноуденнинг адвокати Анатолий Кучерена махсус хизматларининг собиқ ходимига Норвегияга бормасликни тавсия қилганди, чунки Осло ва Вашингтон ўртасида экстрадиция тўғрисида келишув бор. «Норвегия Сноуденнинг кишилар ҳаётига бостириб киришдек яширин эшитишга қарши курашдаги хизматларини юқори баҳолагани учун миннатдорчилик билдирамиз, бироқ улар мавжуд ўзига хосликларни тушуниш билан қабул қилишлари лозим», — деганди адвокат.
Аввалроқ АҚШ Давлат департаменти вакили Мари Харф Норвегия ҳукуматига Сноуденни ўз мамлакатига таклиф қилишдан тийилишни тавсия қилганди. «Биз исталган мамлакатга шундай маслаҳат берган бўлардик. У фақат бир жойга — АҚШга йўл олиши ва ўзига қўйилган барча айбловлар юзасидан жавоб бериши керак», — деди Харф.
Норвегия адабиёт ва фикр эркинлиги академияси 2 июль куни «АҚШ ҳукуматининг одамларнинг шахсий ҳаётига бостириб киришига қарши кураши учун» Сноуденни йиллик мукофот билан тақдирлаган эди. Тақдимоти 2004 йилдан бери ўтказиб келинаётган Бернстерне Бернсон номидаги мазкур соврин билан бирга 100 минг крона миқдорида пул мукофоти ҳам берилади.
Изоҳ (0)