Локал гигантизмдан азият чекаётган 8 ёшли ҳиндистонлик Муҳаммад Калим ўнг қўлини кичрайтириш бўйича сўнгги операцияни муваффақиятли ўтказди. The Daily Mail’нинг ёзишича, болакай 2014 йилдан бери кетма-кет жарроҳлик амалиётларини бошдан ўтказмоқда.
Нашрнинг қайд этишича, бола ўз қўлидан фойдалана олади, чунки операция давомида асаб толаларига зарар етмаган. Операциядан сўнг тезроқ тикланиши учун Калим физиотерапия курсини ҳам ўтайди. Шифокорлар Калимнинг иккинчи қўлини ҳам операция қилишни режалаштирмоқда.
Даволаниш жараёни муваффақиятли кечаётганига қарамай, Калимнинг она қишлоғида унинг соғайиб кетишига кўпчилик ишонмаяпти. «У иблиснинг боласи», — дейди оиланинг қўшниларидан бири. Унинг фикрича, ота-онасининг ёмон қилмишлари сабаб Калим дуойибад қилинган. Қишлоқ оқсоқоли эса нисбатан юмшоқ фикр билдирди — у боланинг келажаги борлигига ишонади.
«Қишлоқдагилар ғийбатни яхши кўради, мана, муҳокама қилишяпти. Лекин у бизнинг фарзандимиз ва биз у ҳақда қайғуришимиз керак», — деди боланинг отаси Муҳаммад Шамим. Отанинг умид қилишича, Калим нормал ҳаёт тарзига қайтиши ва мактабга қабул қилиниши мумкин. Қайд этиш жоиз, аввалроқ Калим бошқа ўқувчиларини қўрқитиб юборади, деган сабаб билан уни мактабга ўқишга қабул қилишмаганди.
Маҳаллий мактаб директори операциядан сўнг болани ўқишга қабул қилишга тайёрлигини ва ўқитувчилар Калимга тўғри муносабатда бўлишлари учун уларга тегишли кўрсатма беришини маълум қилди.
Изоҳ (0)