Бельгияда «Uzbekistan Profile» номли янги нашр фаолияти йўлга қўйилди

Бельгияда «Uzbekistan Profile» номли янги ойлик ахборот бюллетени нашрдан чиқа бошлади. Бу ҳақда «Жаҳон» ахборот агентлиги хабар бермоқда.

Ўзбекистоннинг Брюсселдаги элчихонаси томонидан чоп этиладиган ушбу нашрда Ўзбекистоннинг замонавий ижтимоий-иқтисодий ривожланиши ҳақидаги хабар-мақолалар мунтазам равишда европалик ўқувчиларнинг эътиборига ҳавола қилинади.

Инглиз тилида чиқа бошлаган «Uzbekistan Profile» Европанинг сиёсий, ишбилармон, эксперт ва жамоатчилик доиралари, Европа Иттифоқи институтлари, Европарламент, НАТО вакиллари ҳамда Брюсселда аккредитациядан ўтган бошқа халқаро ташкилотлар ўртасида тарқатилади.

Нашрнинг биринчи сонидан Ўзбекистон Президентининг Жанубий Кореяга ташрифи, «Ўзбекистон - Европа Иттифоқи» ҳамкорлик кенгашининг 12-йиғилиши якунлари, Ўзбекистон ТИВ раҳбарининг Ислом конференцияси ташкилоти Вазирлар кенгашининг 42-сессиясидаги иштирокига оид хабарлар, «Кексаларни эъзозлаш йили»га бағишланган мақолалар, хусусий мулкнинг ишончли муҳофазаси, кичик бизнес ва хусусий тадбиркорлик тараққиёти, бу жабҳани ривожлантириш юзасидан Ўзбекистонда кўрилаётган чора-тадбирлар ҳақидаги ахборотлар ўрин олган.