Венада Қозоғистон президентининг собиқ куёви шериклари устидан суд бошланди
Қозоғистонлик икки банк менежерини ўлдиришда айбланаётган Қозоғистон Миллий хавфсизлик қўмитаси (МХҚ) собиқ раҳбари Алнур Мусаев ва Қозоғистон президентини қўриқлаш хизмати ходими Вадим Кошляк устидан суд жараёни сешанба куни Венада бошланди. Бу ҳақда «РИА Новости» хабар бермоқда.
Ушбу иш бўйича бош айбланувчи, Қозоғистоннинг Австриядаги собиқ элчиси ва Қозоғистон президенти Нурсултон Назарбоевнинг собиқ куёви Рахат Алиев февраль ойи охирида Вена қамоқхонасида осилган ҳолда топилган эди.
Суд жараёни жуда кенг миқёсли бўлади – ҳозирча 27та суд мажлиси белгиланган, 60га яқин (асосан, Қозоғистондан) гувоҳлар чақирилган, учта эскпертизага буюртма берилган, рус тилини биладиган 10дан ортиқ суд таржимонлари ва гувоҳларни Қозоғистондан олиб келиш учун сайёҳлик агентлиги ёлланган.
Суд давомида Қозоғистондаги, хусусан, озодликдан маҳрум этилган гувоҳларни видеоалоқа орқали сўроқ қилиш ҳам кўзда тутилган. Аввалроқ, Австрия нашрлари судга 90дан ортиқ гувоҳлар келиши, уларнинг 60дан ортиғи Қозоғистондан эканлиги ҳақида хабар берган эди.
Айблов томонининг таъкидлашича, «Нурбанк»га эгалик қилган Алиев ўзини, унинг ортидан зарарга ишлайдиган операцияларни амалга оширган банк менежерлари томонидан алданган деб ҳисоблаган. Шу сабабли Алиев, Мусаев ва Кошляк 2007 йил февралида тил бириктиришган, натижада икки менежер – Жўлдас Тимралиев ва Айбар Ҳусенов пластик қоп ва арқон ёрдамида бўғиб ўлдирилган. Уларнинг жасади 2011 йил май ойига келиб чиқиндихонада, оҳак тўлдирилган металл бочкаларнинг ичидан топилган.
Оқлов томони эса воқеаланинг бу талқинини «Қозоғистон ҳуқуқни муҳофаза қилиш органлари томонидан тўқиб чиқарилган» деб ҳисобламоқда. Айбланувчиларнинг адвокатлари сўзларига кўра, менежерлар Қозоғистон раҳбарияти кўрсатмасига асосан махсус хизматлар томонидан ўлдирилган, айбланувчилар эса Алиевнинг президентликка интилишлари сабаб сиёсий таъқиб объектига айланишган. Адвокатларнинг таъкидлашича, айблов томони Қозоғистон ҳуқуқни муфоҳаза қилиш идоралари томонидан тақдим этилган ёлғон маълумотларга қасддан асосланмоқда.
Бунгача Австрия суди Алиев ва унинг шерикларини Қозоғистонга топширишдан бир неча бор бош тортганди. Австрия томонининг фикрича, Алиев ва унинг шерикларини Қозоғистонда адолатли ва мустақил равишда суд қилишларига умид қилиб бўлмайди.
