Сибирда, Россиянинг Ханти-Мансилар мухтор округида жойлашган Советский номли кичик шаҳарда кекса мусулмон аёл − Фанзия Нигматжанова олти йил давомида масжид барпо этди, деб хабар бермоқда «Мусулманка» журнали.
Масжид қурилиши бошланганда аёлнинг ёши 60 да бўлган, ҳозир эса унинг ёши 67 да. Масжид қурилиши учун ҳужжат тўплашни Фанзия Нигматжанова 2006 йилда бошлаган. Унинг сўзларига кўра, қурилиш учун «Газпром» 800 минг рубль, «Северавтодор» 300 минг рубль, «Лукойл» 1 200 000 рубль миқдорида ёрдам кўрсатган.
Фанзия Нигматжанованинг қайд этишича, қурилиш давридаги барча ташкилий ишлардан ташқари, жисмоний ишларга ҳам фаол аралашиб юрган. Бошланишида ёрдам берувчилар унчалик кўп бўлмаган, кейин эса уларнинг сони ортиб борган. Жумладан, у масжид қурилишига беминнат ёрдам кўрсатган тожик қурувчиларини, шунингдек, ёрдамини аямаган рус мутахассисларини алоҳида эътироф этган. Аёлнинг таъкидлашича, Татаристон президенти Рустам Миннихановнинг ҳам ҳиссаси қўшилган.
Масжид 2014 йилда очилган бўлиб, қўшимча қисмлар қурилиши давом этмоқда. 67 ёшга кирганига қарамай, ғайратга тўлган аёл эса масжидни тўлиқ қуриб битказиш учун ёрдам берувчилар топилишига умид билдирган.
Изоҳ (0)