“Mail.ru”ning avtomobillar bo‘limi Rossiyada 500 ming rublgacha bo‘lgan mashinalar reytingini tuzdi. Ushbu beshlikda birinchi o‘rinni Daewoo Gentra egalladi.
Daewoo Gentra’ning narxi 419 ming rubl (taxminan 7340 dollar)dan boshlanishi, optimal komplektatsiya esa 499 ming rubl (8740 dollar)ga tushishi qayd etildi.
“Daewoo Gentra faqat sedan kuzovida hajmi 1,5 litrga teng benzinli to‘rt silindrli yagona dvigatelli holatda taklif etiladi. Ushbu motor Toshkentdagi GM Powertrain Uzbekistan korxonasida ishlab chiqiladi va avval Chevrolet Lacetti’ga qo‘yilgan agregatlardan xususiyatlariga ko‘ra biroz farqlanadi”, — deb yozadi nashr.
Shuningdek bazaviy Gentra’ni xarid qilish tavsiya etilmagan. “U ‘bo‘sh’ va ‘xavfli’”, — deya qayd etiladi xabarda hamda unda xavfsizlik yostiqlari yo‘qligi ta’kidlanadi. Antiblokirovka tizimi, ikkita xavfsizlik yostig‘i, konditsioner, elektr paket, kreslolarni isitish tizimi va boshqa zarur narsalarga ega Optimum Plus komplektatsiyasi tavsiya etilgan.
Reytingning keyingi pog‘onalarini Renault Logan (425 ming rubl — 7520 dollardan boshlanadi, optimal komplektatsiyasi 507 500 rubl — 8980 dollar), Lada Kalina Cross (471 ming rubl — 8330 dollardan boshlanadi), Datsun on-DO (376 ming rubl — 6650 dollardan boshlanadi, optimal komplektatsiyasi 447 ming rubl — 7900 dollar), Lada Granta liftbeki (348 800 rubl — 6170 dollardan boshlanadi, optimal komplektatsiyasi 401 600 rubl — 7100 dollar) egalladi.
Izoh (0)