Facebook’даги «Водители Ташкента» гуруҳига Тошкент шаҳрида ҳайдовчилар томонидан йўл ҳаракати қоидалари қўпол равишда бузилгани акс этган видеолавҳа жойлаштирилди.
Автомобиль видеорегистратори орқали ёзиб олинган видеода Абай кўчасида бир нечта автомобиль қарама-қарши йўналишда ҳаракатланиб, олдиндан тўғри йўналишда автомобиль келганда, ўз йўналишига қайтиш ўрнига қарама-қарши йўналишдаги йўлнинг бошқа бўлагига ўтгани акс этган.
Жумладан, дастлаб давлат рақами 01 M 322 JA бўлган оқ Spark, кейин рақами аниқланмаган оқ Spark худди шундай ҳаракатни такрорлаган. Сўнгра давлат рақами 01 P 821 FA бўлган оқ Nexia қарама-қарши йўналишдан келиб, тўғри йўналишдан келаётган автомобилнинг қаршисида тўхтаб қолган. Орқасидан рақами аниқланмаган кулранг Lacetti келиб, қарама-қарши йўналишдаги йўлнинг бошқа бўлагига ўтиб кетгач, бир неча уринишдан кейин Nexia ҳам бошқа бўлакка ўтиб кетган.
Шунингдек, давлат рақами 01 U 804 PA бўлган оқ Spark, давлат рақами 01 L 615 OA бўлган қора Nexia, рақами аниқланмаган оқ Lacetti ва бошқа кўплаб автомобиллар йўлнинг қарама-қарши йўналишларини ажратувчи чизиқни босиб ва қарама-қарши йўналишга ўтиб ҳаракатланган.
Гуруҳ фойдаланувчилари қарама-қарши йўналишда ҳаракатланган ҳайдовчиларга нисбатан нафратини яшириб ўтирмаган. Шунингдек, уларга қарама-қарши йўналишдаги йўлнинг бошқа бўлагига ўтишга ҳам имкон бермаслик лозимлиги қайд этилган.
137 сония давом этган лавҳада жами 15 та автомобиль қарама-қарши йўналишларни ажратувчи чизиқни босган ёки қарама-қарши йўналишга ўтиб ҳаракатланган. Ўзбекистонда ушбу қоидабузарлик учун энг кам иш ҳақининг 10 баравари − 1 184 000 сўм миқдорида жаримага тортилиши белгилаб қўйилган. Демак, 2 дақиқадан кўпроқ вақт оралиғида жами 17 760 000 сўм жарима қайд этилиши мумкин эди.
Изоҳ (0)