Иккинчи «қора қути» маълумотлари Францияда ҳалокатга учраган Airbus А320 иккинчи учувчиси Андреас Любиц онгли равишда ҳаракат қилганини кўрсатди, дея хабар бермоқда «Газета.ru».
Шунингдек, учувчи самолёт қояга урилишидан олдин тезликни оширгани маълум бўлди.
«Олинган дастлабки маълумотлар шуни кўрсатдики, самолёт 30 метр баландликка тушиши учун учувчи автопилот дастурини ўзгартирган. Бундан ташқари, учувчи қулашдан аввал самолёт тезлигини оширган», — деди тергов гуруҳи вакили.
Аввалроқ Germanwings авиакомпанияси самолёти ҳалокатида айбдор деб ҳисобланаётган учувчи Андреас Любиц жами бир ярим йил психиатр кўмагида даволангани маълум бўлган эди.
Эслатиб ўтамиз, 24 март куни Барселонадан Дюссельдорфга парвоз қилаётган Airbus А320 самолёти Франция жанубида, Альп тоғлари устида ҳалокатга учраши оқибатида лайнер бортида бўлган 150 кишининг барчаси ҳалок бўлган эди.