66 кун давомида Атлантика океанида синган яхтада оқим билан кўчиб юрган америкалик Луис Жордан ниҳоят қутқариб олинди, дея хабар бермоқда Meduza.
Яхтада сузиш бўйича тажрибаси кам бўлган 37 ёшли Луис январь охирида 35 футли яхтасида Жанубий Каролина штати соҳилларидан балиқ овлаш учун отланди. У балиқ тутиш учун қулай жой топишга уринаётган маҳал кемаси ағдарилиб кетди.
Яхта вертикал ҳолатга қайтди, бироқ мачта синган, барча ускуналар, жумладан рация ва GPS-навигатор ишдан чиққан эди.
Жорданнинг айтишича, яхтада бироз озиқ-овқат захираси ва чучук сув бўлган. Улар тугагач, эркак ёмғир сувини ичиб, хом балиқ билан озиқланган.
Жорданни Шимолий Каролина соҳилларидан 320 км масофада юк ташувчи кема кўриб қолган ва ўз бортига чиқариб олган. Яхтачининг аҳволи қониқарли деб баҳоланмоқда.