66 kun davomida Atlantika okeanida singan yaxtada oqim bilan ko‘chib yurgan amerikalik Luis Jordan nihoyat qutqarib olindi, deya xabar bermoqda Meduza.
Yaxtada suzish bo‘yicha tajribasi kam bo‘lgan 37 yoshli Luis yanvar oxirida 35 futli yaxtasida Janubiy Karolina shtati sohillaridan baliq ovlash uchun otlandi. U baliq tutish uchun qulay joy topishga urinayotgan mahal kemasi ag‘darilib ketdi.
Yaxta vertikal holatga qaytdi, biroq machta singan, barcha uskunalar, jumladan ratsiya va GPS-navigator ishdan chiqqan edi.
Jordanning aytishicha, yaxtada biroz oziq-ovqat zaxirasi va chuchuk suv bo‘lgan. Ular tugagach, erkak yomg‘ir suvini ichib, xom baliq bilan oziqlangan.
Jordanni Shimoliy Karolina sohillaridan 320 km masofada yuk tashuvchi kema ko‘rib qolgan va o‘z bortiga chiqarib olgan. Yaxtachining ahvoli qoniqarli deb baholanmoqda.
Izoh (0)