Сингапурнинг биринчи бош вазири вафот этгани ҳақидаги ёлғон хабар муаллифи 10 йилга қамалиши мумкин

Сингапур полицияси мамлакат биринчи бош вазири Ли Куан Юнинг гўёки вафот этгани ҳақидаги ёлғон хабарни тарқатган хакер шахсини аниқлади, дея хабар бермоқда ТАСС. У маҳаллий ўқув муассасаларидан бирида ўқийдиган вояга етмаган йигит бўлиб чиқди. У 36,1 минг долларгача миқдорда жаримага тортилиши ёки 10 йилгача қамоқ жазосига маҳкум этилиши мумкин.

Полиция хабарига кўра, у айни пайтда қўлга олинган ва терговга ёрдам бермоқда.

Бош вазир матбуот хизмати 18 март куни 91 ёшли Ли Куан Юнинг аҳволи ёмонлашгани ҳақида баёнот берди. Орадан бир неча соат вақт ўтиб, интернетда гўёки «Сингапур ҳукумати маъмурияти» томонидан тарқатилган эълон пайдо бўлди, унда Ли Куан Юнинг вафот этгани айтилганди.

Сингапур давлатининг асосчиси бешинчи февраль куни ўткир зотилжам касаллиги билан шифохонага ётқизилган эди. Ҳозирда унинг аҳволи шифокорлар томонидан оғир дея баҳоланмоқда.

Маълумот учун, Ли Куан Ю Сингапур ҳукумати тепасига 1959 йилда келган бўлиб, давлатни 1990 йилгача узлуксиз бошқарган. Айнан унинг даврида Сингапур қашшоқ давлатлар қаторидан чиқиб, дунёнинг молиявий марказларидан бирига айланган, аҳоли турмуш даражаси бўйича эса юқори учликдан жой олган.