2010 йили Нью-Йорк кино академиясининг режиссёрлик курсларини битирган ўзбекистонлик таниқли актёр ва спортчи Аҳмад Бердимуродов 22 февраль куни бўлиб ўтадиган «Оскар» мукофотларини топшириш маросимида қатнашишни режалаштирмоқда. Бу ҳақда «12news.uz» хабар берди.
Актёрнинг айтишича, у яқинда Universal Pictures, Columbia Pictures va Sony Entertainment Pictures компаниялари билан шартнома тузган. Бундан ташқари, унга Голливуд Актёрлар гилдиясидан таклифлар тушган.
«Мен Киноактёрлар гилдияси аъзосиман, улар мени ҳар ойда 2—3 та рол билан таъминлаб туриши керак», — деди Бердимуродов АҚШ ОАВларига берган интервьюсида.
У шунингдек, 22 февраль куни 87-«Оскар» мукофотларини топшириш маросимида Security Industry Specialist компаниясининг хавфсизлик ходими сифатида иштирок этишини маълум қилди.
«Биз етти кишидан иборат соқчилар бригадаси таркибида ‘Оскар’ ҳайкалчаларини қўриқлаймиз», — дея таъкидлади Бердимуродов.
46 ёшли актёр «Шайтанат», «Паноҳ», «Севгинатор», «Тузоқ», «Қалбим ўғриси», «Макрли дунё», «Тартиб» каби фильм ва сериалларда суратга тушган.
Изоҳ (0)