3 февраль куни Германиянинг Ўзбекистондаги Фавқулодда ва мухтор элчиси Хёфер-Виссинг Найтхарт Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитага ташриф буюрди. Меҳмонни қўмита раиси О.Юсупов қабул қилди. Бу ҳақда қўмитанинг расмий сайтида хабар берилди.
О.Юсупов Германия элчисига Ўзбекистондаги диний воқеълик ва Дин ишлари бўйича қўмита фаолияти хусусида маълумот берди.
Хёфер-Виссинг Найтхарт элчи этиб тайинланганлигига кўп вақт бўлмаганига қарамай, Республикадаги баъзи диний ташкилотлар раҳбарлари билан учрашиш имкониятига эга бўлганлигини қайд этди. Ҳозирда Германияда маълум сабабларга кўра ислом дини диққат-эътибор остида эканлигини билдириб, у Ўзбекистонда ислом дини ривожи, шунингдек, ислом динининг бошқа динлар билан муносабати билан қизиқаётганлигини маълум қилди.
Элчи йил бошида Францияда бўлиб ўтган нохуш воқеаларга тўхталар экан, Германия ҳудудида динларга нисбатан бундай беҳурматлик кўрсатилишига умуман йўл қўйилмаслигини маълум қилди.
У Германияда ислом дини турли кўринишларга эга эканлигини таъкидлар экан, жамиятда тинчлик барқарорлиги ва турли нохуш ҳолатлар вужудга келмаслиги учун диний фаолият олиб бораётган имомларнинг турли мамлакатлардан келганлигини инобатга олиб, имомлар тайёрлов курслари ташкил этилганлигини қайд этди.
Шу билан бирга элчи ислом динида тинчлик ва осойишталикни сақлашда катта тажрибага эга бўлган Ўзбекистоннинг соҳа мутахассислари билан яқиндан ҳамкорликни йўлга қўйиш Германия учун катта аҳамиятга эга эканини ҳам билдириб ўтди.
Бу фикрни қувватлаб О.Юсупов, қўмита томонидан Халқаро бағрикенглик кунига бағишлаб Тошкент ислом университетида ҳар йили тадбир ўтказиб келаётганини ҳамда мазкур тадбирда Ўзбекистонда фаолият кўрсатаётган барча диний ташкилотлар, дипломатик корпус ҳамда бошқа жамоат ташкилотлари вакиллари иштирок этаётганини таъкидлади.
Суҳбат ўзаро самимий мулоқот тарзида ўтказилди.
Изоҳ (0)