2015 йил 15 январь куни «Пойтахт» бизнес марказида Миллий эстрада санъатини ривожлантириш ва мувофиқлаштириш Кенгаши ҳамда «Ўзбекнаво» эстрада бирлашмасининг 2014 йилги фаолияти якунига бағишланган ҳисобот йиғилиш бўлиб ўтди, деб хабар бермоқда «Popcorn.uz».
Мазкур тадбирда Миллий эстрада санъатини ривожлантириш ва мувофиқлаштириш Кенгаши аъзолари, Бирлашма ходимлари, устоз санъаткорлар, ёш хонандалар ҳамда оммавий ахборот воситалари вакиллари иштрок этишди.
Йиғилишда ўтган йил давомида давлат ва жамоатчилик тадбирларида, хусусан, пахта йиғим-терими мавсумида жойларда уюштирилган концертларда фаол қатнашган хонандалар махсус дипломлар билан тақдирландилар.
Тадбирда сўзга чиққан масъул ходимлар концерт дастурлари жонли ижрода ўтишига катта эътибор қаратиш лозимлиги, бу борада йўлга қўйилаётган ишлар ҳақида айтиб ўтишди.
Тадбир давомида эстрадада ижод қилаётган хонандалардан, Шаҳзода, Лола, Шоҳруҳхон, Самандар Ҳамроқулов, «Божалар» гуруҳи, «Сурхон» гуруҳи, Азим Муллахонов, Манзура, Ойбек ва Нигора, Алишер Файз, Улуғбек Раҳматуллаев, Собиржон Мўминов ва бир қатор бошқа санъаткорлар, «Тарона Реcордс» компанияси раҳбари, продюсер Сарвар Раҳматуллаев, бастакор Шуҳрат Закиров, шоирлардан Сирожиддин Саид, Фарида Афрўз, шунингдек, санъатимиз ривожига узоқ йиллар муносиб ҳисса қўшган ёши улуғ санъаткорлар, композиторлар диплом ва эсдалик совғалари билан тақдирландилар.
Йиғилиш давомида бу йил ўнинчи бор ўтказиладиган «Шарқ тароналари» фестивали ва унга кетаётган тайёргарлик ишлари ҳақида сўз борди. Ўтган йилларда 62 давлатдан санъаткорлар қатнашган бўлса, бу йилги фестивалга 98 та мамлакатдан иштрок этиш истаги билдирилгани маълум қилинди. Бу борада яна ижодий суҳбатлар ўтказилиши ва оммавий ахборот воситалари ходимларига хабар берилиши алоҳида айтиб ўтилди.
Изоҳ (0)