2015 йилда Ўзбекистонда қишлоқ жойларда 12 мингта уй-жой қурилади
2015 йилда Ўзбекистонда қишлоқ жойларда намунавий лойиҳалар бўйича 12 мингта якка тартибдаги уй-жой қурилади. Бу ҳақда Ўзбекистон Республикаси Президентининг «2015 йилда Қишлоқ жойларда намунавий лойиҳалар бўйича якка тартибдаги уй-жой қурилиши дастури ва 2016 йилги қурилишнинг асосий параметрлари тўғрисида»ги қарори (pdf)да айтилади.
Ҳужжат қишлоқ аҳоли пунктларининг архитектура-режалаштириш қиёфасини янада тубдан яхшилаш, намунавий лойиҳалар бўйича якка тартибдаги уй-жой қурилиши кўламини кенгайтириш, қишлоқда транспорт, муҳандислик-коммуникация ва ижтимоий инфратузилма объектларини жадал ривожлантириш ҳисобига қишлоқ аҳолисининг турмуш даражаси ва сифатини ошириш мақсадида қабул қилинди.
Қарорга мувофиқ, 292 та массивда 12 мингта якка тартибдаги уй-жойлар қурилади. Дастур доирасида 277,4 км сув таъминоти тармоқлари, 273,5 км электр таъминоти тармоқлари, 283,9 км газ таъминоти тармоқлари ва 244,4 км автомобиль йўллари қурилиши режалаштирилган.
2015 йилда қишлоқ жойларда уй-жойлар қурилишига умумий қиймати 500 миллион долларга тенг «Қишлоқ жойларда уй-жой қурилишини ривожлантириш» лойиҳасини молиялаштиришнинг кўп траншли дастури учинчи транши доирасида Осиё тараққиёт банкининг 100 миллион долларга тенг заём маблағлари йўналтирилади.
Ҳужжатда айтилишича, 2016 йилда Ўзбекистонда 305 та массивда 13 мингта якка тартибдаги уй-жой қурилади.
