2014 йилнинг декабрида Бутунжаҳон интеллектуал мулк ташкилотининг (БИMТ) 2014 йил учун World Intellectual Property Indicators - «Интеллектуал мулк соҳасидаги фаолиятнинг жаҳон кўрсаткичлари» маърузаси нашр қилинди, дея хабар бермоқда Ўзбекистон Республикаси Интеллектуал мулк агентлиги расмий сайти. Маъруза интеллектуал мулкнинг қуйидаги соҳаларини қамраб олган кенг миқёсдаги кўрсаткичлардан иборат: патентлар, фойдали моделлар, товар белгилари, саноат намуналари, ўсимлик навларини муҳофазалаш. Унда миллий ва ҳудудий интеллектуал мулк идоралари, БИMТ ва Жаҳон банки томонидан тақдим қилинган маълумотлардан фойдаланилган.
Жаҳон бўйича интеллектуал мулк объектларини рўйхатга олиш учун талабномаларни топшириш фаоллиги патентлар бўйича 9%, товар белгилари бўйича 6,4%, саноат намуналари бўйича 2,5% ва ўсимликлар навлари бўйича 6,3% ошди.
2013 йилда новаторлар томонидан бутун жаҳонда 2,57 миллион патент талабномалари топширилган, бу 2012 йилга нисбатан 9 фоизга кўпдир. Улардан 1,71 миллиони мамлакатлар резидентлари, 0,86 миллиони норезидентлар томонидан топширилган.
Дунёда топширилган талабномаларнинг ярмидан ортиғи Хитой (бутун дунё ҳажмидан 32,1%) ва АҚШда (22,3%) топширилган, шу вақтнинг ўзида Европа патент идорасига (ЕПИ) топширилган талабномаларнинг улуши бутун дунё бўйича ҳажми камайиб 5,8 фоизни ташкил қилди.
БИMТ маърузасида айтилишича, 2013 йилда Ўзбекистон Республикаси Интеллектуал мулк агентлиги томонидан ихтироларга 557 та талабнома қабул қилинди. Шулардан миллий талабнома топширувчилардан — 299 та, чет эллик талабнома топширувчилардан — 258 та талабнома қабул қилинди.
БИMТга аъзо бўлган 188 давлат орасида топширилган талабномалар сонига кўра Ўзбекистон Республикаси ихтиролар бўйича 67-ўрин, фойдали моделлар — 32, саноат намуналари — 61, товар белгилари — 64, селекция ютуқлари (ўсимлик навлари) бўйича эса 40-ўринни эгаллади.
Саноат мулки объектларидан учтаси: ихтиролар, товар белгилари ва саноат намуналари бўйича топширилган талабномаларнинг сонига кўра Ўзбекистон тегишлича 54, 57 ва 54-ўринларни эгаллади.
Изоҳ (0)