2018 йилда Россияда футбол бўйича Жаҳон чемпионати арафасида бешинчи авлод алоқа тармоғи ишга туширилади, деб хабар бермоқда «Российская газета».
5G тармоғини ишлаб чиқиш билан «Мегафон» мобил алоқа оператори ҳамда Хитойнинг Huawei компанияси шуғулланади. «Мегафон» баёнотида айтилишича, 5G тармоғининг асосий вазифаси фойдаланилаётган частоталар спектрини кенгайтириш ҳисобига тармоқ инфратузилмасини яхшилаш бўлади.
5G стандартидан фойдаланиш тармоқда сигнал жўнатишдаги юклама ва тўхталишларни камайтиради. Натижада бу мобил интернетнинг тезлигини сезиларли даражада оширади. Масалан, видео умуман куттирмасдан биринчи сониядаёқ ишга тушади. 5G технологиясида интернет тезлиги 4G стандартига қараганда 100 марта юқори бўлиши кўзда тутилган.
Huawei ушбу лойиҳа учун 600 миллион доллар сармоя ажратиши айтилган. Шундай қилиб, Россия бешинчи авлод тармоғи фойдаланиладиган илк давлатга айланади. 5G Японияда 2020, Буюк Британияда 2022 йилда ишга туширилиши кўзда тутилган.