2018-yilda Rossiyada futbol bo‘yicha Jahon chempionati arafasida beshinchi avlod aloqa tarmog‘i ishga tushiriladi, deb xabar bermoqda “Rossiyskaya gazeta”.
5G tarmog‘ini ishlab chiqish bilan “Megafon” mobil aloqa operatori hamda Xitoyning Huawei kompaniyasi shug‘ullanadi. “Megafon” bayonotida aytilishicha, 5G tarmog‘ining asosiy vazifasi foydalanilayotgan chastotalar spektrini kengaytirish hisobiga tarmoq infratuzilmasini yaxshilash bo‘ladi.
5G standartidan foydalanish tarmoqda signal jo‘natishdagi yuklama va to‘xtalishlarni kamaytiradi. Natijada bu mobil internetning tezligini sezilarli darajada oshiradi. Masalan, video umuman kuttirmasdan birinchi soniyadayoq ishga tushadi. 5G texnologiyasida internet tezligi 4G standartiga qaraganda 100 marta yuqori bo‘lishi ko‘zda tutilgan.
Huawei ushbu loyiha uchun 600 million dollar sarmoya ajratishi aytilgan. Shunday qilib, Rossiya beshinchi avlod tarmog‘i foydalaniladigan ilk davlatga aylanadi. 5G Yaponiyada 2020, Buyuk Britaniyada 2022-yilda ishga tushirilishi ko‘zda tutilgan.
Izoh (0)