2014 йил май ойида Мисрда бўлиб ўтган «Қўлда ясалган ўйинчоқлар» халқаро болалар ижодиёти танловида ўзбекистонлик ёш ижодкорлар томонидан яратилган миллий ўйинчоқлар олтин ва кумуш медаллар ҳамда махсус сертификатларга лойиқ топилган эди. Ўзбекистон Бадиий академиясида ижод намуналари халқаро танловда ғолиб бўлган ўқувчи-ёшларни тақдирлашга бағишланган тадбир бўлиб ўтди. Бу ҳақда Ўзбекистон Миллий ахборот агентлиги хабар бермоқда.
Миср Араб Республикасида бўлиб ўтган халқаро танловда ўзбекистонлик ёшлар томонидан тайёрланган миллий қўғирчоқлар нафислиги, жозибадорлиги, табиий материаллардан тайёрланганлиги билан алоҳида эътироф этилди.
Республика дизайн коллежи ўқувчиси Дилдора Қаюмова, Шаҳрисабз педагогика коллежи ўқувчиси Фотима Собирова тайёрлаган миллий қўғирчоқлар олтин медалга сазовор бўлди. Қашқадарё вилояти ихтисослаштирилган санъат мактаб-интернати ўқувчилари Дурдона Нуриллаева ҳамда Маржона Эгамованинг ижод намуналари кумуш медалга лойиқ кўрилди. Мазкур билим даргоҳи ўқувчилари Фарангиз Аҳадова, Дилдора Ибодуллаева, Республика рассомлик коллежи ўқувчилари Гулмира Темирова, Нозима Шодиева, Гулираъно Шукурова ишлаган миллий ўйинчоқлар махсус сертификат билан тақдирланди.
Бадиий академияда бўлиб ўтган тадбирда ғолиб ва совриндорларга медаль ва сертификатлар топширилди.
Изоҳ (0)