АҚШ мудофаа департаменти вакили контр-адмирал Жон Кирби Қўшма Штатлар Россиядан келиши мумкин бўлган хавфга тайёр туриши кераклигини маълум қилди. Бу ҳақда Korrespondent.net хабар бермоқда.

«Стратегик муҳит ҳозирда жуда ҳаракатчан ва ишончсиз. Бу ишончсизликни Владимир Путиннинг Украина ҳудуди ичкарисида ва ташқарисида қилаётган ҳаракатлари келтириб чиқармоқда. Биз Европада керак бўладиган маълум тайёргарлик имкониятлари ҳақида ўйламаслигимиз мумкин эмас эди, чунки НАТО битими бўйича ўз шерикларимиз олдида фавқулодда мажбуриятларимиз бор», − деди Кирби.

Шунингдек, у аввалроқ Пентагон раҳбари Чак Хейгелнинг америкалик ҳарбийларга Россия армияси билан тўқнашув эҳтимолига тайёр туриш тўғрисида айтган гапларига изоҳ бериб, бу Москва учун таҳдид эмас, балки Вашингтон ўз олдида турган муаммоларга тайёр туриши лозимлиги тўғрисидаги баёнот эканлигини маълум қилган.