«Вонгфонг» супертўфони Япониянинг энг жанубий Окинава префектурасига яқинлашиб қолган ва шанба, 11 октябрь куни эрталаб асосий орол соҳилларига ёпирилиши мумкин, деб хабар бермоқда «РИА Новости».
Япония метеорология бошқармаси тўфоннинг ҳажми улканлигини ва ҳаддан ташқари кучлилигини эътироф этган. Тўфон марказида босим 920 гектопаскални, шамол тезлиги 50 метр/секундни ташкил этиши айтилмоқда. Бундай куч электр таъминоти устунларини бузиб ташлаш учун етарли бўлади. Тунда Окинавада ёғингарчилик соатига 80 миллиметрга, эртага кундузи эса 200 миллиметргача чиқиши тахмин қилинмоқда.
Аввал хабар берилганидек, дам олиш кунлари тўфон шимолроққа ҳаракатланиб, Кюсю оролига етиб боради. Келаётган душанба куни эса Япониянинг энг катта ороли − Хонсюга ёпирилиб, сешанба куни марказга, жумладан Токиога етади.
Эслатиб ўтамиз, ўтган ҳафта охирида Япониянинг марказий қисмига «Фанфон» тўфонининг ёпирилиши натижасида 6 киши ҳалок бўлган ва 4 киши бедарак йўқолган, 1,9 миллион киши эвакуация қилинган; қуруқлик транспорти ҳаракатида узилишлар бўлиб, 607 та авиарейс бекор қилинган эди.