Асли Наманган вилоятининг Поп туманидан бўлган 42 ёшли Мавлонхон Тўраев 2014 йилнинг 1 август куни Ўзбекистон мустақаллигининг 23 йиллиги олдидан ўзига хос лойиҳани амалга оширишга киришди. У ногирон бўлишига қарамай, аравачада Тошкентдан Самарқанд вилоятигача бўлган ҳудудни босиб ўтишни ният қилган. Бу ҳақда Жиззах шаҳар ҳокимлиги ахборот хизмати хабар берди.
«Бу хайрия марафонимизнинг иккинчи босқичи саналади. Дастлаб ‘2010 — Баркамол авлод йили’нинг август, сентябрь ойларида биринчи босқични муваффақиятли адо этганмиз», — дейди марафончи Мавлонхон Тўраев.
Тошкент, Сирдарё, Жиззах, Самарқанд ва Тошкент йўналиши бўйича амалга оширилаётган марафоннинг иккинчи босқичида Мавлонхон Тўраевга ўғли Нодирбек ҳамроҳлик қилмоқда.
«Оиламиз билан хайрлашиб чиқиб кетганимизга 15 кун бўлди. Ўғлим билан бирга ушбу хайрия лойиҳасини амалга оширар эканмиз, юртимиздаги тинчлик халқимиз учун шукрона келтириши лозим бўлган неъмат эканлигига амин бўлдик. Турли инсонлар билан учрашдик. Улар билан ҳамсуҳбат бўларканмиз, уни кундалик саёҳат дафтаримизга қайд этиб боряпмиз. Насиб этса, хайрия марафонидан тушган маблағга ушбу хотиралар асосида китоб нашр эттириш ниятидамиз. Оиламиз билан Ўзбекистон ‘Миллий тикланиш’ демократик партиясининг аъзосимиз. Шу партиянинг оилавий бошланғич ташкилоти етакчисиман. Ушбу саёҳат давомида бизни қўллаб-қувватлаган партия вакилларига ва Ўзбекистон Ногиронлар жамияти ҳамда унинг бўлимларига самимий миннатдорчилигимни билдираман», — дея сўзини якунлади М.Тўраев.
Жиззах шаҳрида амалга оширилаётган бунёдкорлик ишлари билан танишгач, марафончи Самарқанд заминига кузатиб қўйилади. Марафоннинг якунланиши истиқлол байрамининг 23 йиллиги арафасида пойтахтдаги «Мустақиллик майдони»да ўтказилади.
Изоҳ (0)