Бразилиялик қария 126 ёшида туғилганлик ҳақида гувоҳномага эга бўлди

126 ёшли соппа-соғлом бразилиялик бўйдоқ узоқ умр кўриш сири билан бўлишди, дея хабар берди The Age. Жозе Агинело душ Сантуш шу пайтгача бирорта ҳужжатга эга бўлмаган. Яқинда унга туғилганлик ҳақида гувоҳнома беришди.

2001 йилдан буён қариялар уйида яшаб келаётган Сантуш у ердагиларга ХХ аср ва ундан аввалроқ ҳам содир бўлган воқеалар ҳақида сўзлаб берган. Уй маъмурияти экспертиза орқали бразилияликнинг дунёдаги энг кекса киши эканини исботламоқчи бўлган. Экспертлар у билан савол-жавоб қилиб, қариянинг XIX аср охирида туғилганини тасдиқлашди. Унга 1888 йил 7 июлда туғилганлигини кўрсатувчи ҳужжат беришди.

Сантушнинг узоқ умр кўриш сири билан қизиққанлар ундан жўяли маслаҳат ола олмадилар. «Бу ёшга етишимнинг сабаби кўп йил яшаганимдадир, — деди у. — Бунинг учун ҳаётимнинг ҳар бир даврини муносиб равишда қабул қилиб, кексаявердим».

Жозе Агинело душ сантуш бемалол ҳассасиз юради, у ўткир ақл ва юмор ҳиссини сақлаб қолган. сўнгги 50 йилдан буён кунига бир қути сигарета чекади. Қонидаги холестерин ва қанд миқдори нормал даражада, қон босими ҳам мукаммал кўрсаткичга эга. У ҳеч қанақа касалликка чалинмаган, ҳеч қандай дори қабул қилмайди.

сантуш Бразилияда қуллик бекор қилинган йили туғилган, унинг ота-онаси банди бўлган. У ҳаётининг кўп қисмини қаҳва плантацияларида ишлаб ўтказган. Жозе ҳеч қачон уйланмаган, болалари ҳам йўқ.

Қариялар уйи талаб этиладиган 22 минг долларни тўлаб, Сантушни Гиннеснинг Рекордлар китобига киритишга бел боғлади. Айни пайтда 116 ёшли япониялик Мисао Окава сайёрамиздаги энг кекса киши ҳисобланади.