126 yoshli soppa-sog‘lom braziliyalik bo‘ydoq uzoq umr ko‘rish siri bilan bo‘lishdi, deya xabar berdi The Age. Joze Aginelo dush Santush shu paytgacha birorta hujjatga ega bo‘lmagan. Yaqinda unga tug‘ilganlik haqida guvohnoma berishdi.
2001-yildan buyon qariyalar uyida yashab kelayotgan Santush u yerdagilarga XX asr va undan avvalroq ham sodir bo‘lgan voqealar haqida so‘zlab bergan. Uy ma’muriyati ekspertiza orqali braziliyalikning dunyodagi eng keksa kishi ekanini isbotlamoqchi bo‘lgan. Ekspertlar u bilan savol-javob qilib, qariyaning XIX asr oxirida tug‘ilganini tasdiqlashdi. Unga 1888-yil 7-iyulda tug‘ilganligini ko‘rsatuvchi hujjat berishdi.
Santushning uzoq umr ko‘rish siri bilan qiziqqanlar undan jo‘yali maslahat ola olmadilar. “Bu yoshga yetishimning sababi ko‘p yil yashaganimdadir, — dedi u. — Buning uchun hayotimning har bir davrini munosib ravishda qabul qilib, keksayaverdim”.
Joze Aginelo dush Santush bemalol hassasiz yuradi, u o‘tkir aql va yumor hissini saqlab qolgan. So‘nggi 50 yildan buyon kuniga bir quti sigareta chekadi. Qonidagi xolesterin va qand miqdori normal darajada, qon bosimi ham mukammal ko‘rsatkichga ega. U hech qanaqa kasallikka chalinmagan, hech qanday dori qabul qilmaydi.
Santush Braziliyada qullik bekor qilingan yili tug‘ilgan, uning ota-onasi bandi bo‘lgan. U hayotining ko‘p qismini qahva plantatsiyalarida ishlab o‘tkazgan. Joze hech qachon uylanmagan, bolalari ham yo‘q.
Qariyalar uyi talab etiladigan 22 ming dollarni to‘lab, Santushni Ginnesning Rekordlar kitobiga kiritishga bel bog‘ladi. Ayni paytda 116 yoshli yaponiyalik Misao Okava sayyoramizdagi eng keksa kishi hisoblanadi.
Izoh (0)