Татаристон муфтийси Комил Самигуллин мамлакатнинг Мусулмонлар марказий диний бошқармаси (ММDB) раиси, олий муфтий — Талгат Тажуддинга Қозонда чоп этилган Қуръоннинг уч минг нусхасини совға қилди. Бу ҳақда ММDB ахборот хизмати маълумотига таяниб, «РИА Новости» хабар қилди.
Қуръон нусхалари Татаристон президентининг авиаҳалокат натижасида ҳалок бўлган 23 яшар ўғли Ирек Минниханов хотираси ҳамда муқаддас Рамазон ойи муносабати билан чоп этилди. Диний бошқармада ёдга олинганидек, ҳалокатга учраган самолёт бортида Ирекдан ташқари яна 50 киши бўлган.
Бошқармада, шунингдек, нусхалар 1917 йилги инқилобгача муқаддас китоблар нашр қилинган «Казан басмаси» («Қозон босмаси») номли арабча шрифт билан Қозон услубида президент Рустам Минниханов буйруғига кўра чоп этилгани ҳақида айтилди.
Эслатиб ўтамиз, Москва — Қозон рейси билан парвозни амалга ошираётган Boeing-737 йўловчи самолёти 2013 йил 17 ноябрь куни ҳалокатга учраган.
Изоҳ (0)