Кавказ ва Марказий Осиё минтақасидаги мамлакатлар қашшоқликка қарши курашиш, таълим соҳаси ва гендер тенглигини таъминлашда сезиларли муваффақиятларга эришди. Бу ҳақда 7 июль куни Нью-Йоркда БМТ Бош котиби Пан Гу Мун томонидан тақдим этилган Мингйилликнинг тараққиёт мақсадлари ҳақидаги маърузада айтилади, деб ёзади Gazeta.uz.
Шу билан бирга, маърузада таъкидланишича, минтақа 2015 йилгача қатор муаммоларни, жумладан атроф-муҳитни ҳимоя қилиш соҳасидаги масалаларни қўшимча ҳаракатларсиз ҳал эта олмайди. Айни пайтда Кавказ ва Марказий Осиёдаги янгиланадиган сув манбалари қисқармоқда, бу минтақада сув танқислиги хавфини келтириб чиқаради.
«Мингйилликнинг тараққиёт мақсадлари» маърузасида Озарбойжон, Арманистон, Грузия, Қозоғистон, Қирғизистон, Тожикистон, Туркманистон ва Ўзбекистонда эришилган ижобий натижалардан мисоллар келтирилди.
2015 йилгача минтақада очин-тўқин яшайдиган аҳоли сонини икки баравар қисқартиришга эришиб бўлинди. Бундай кишиларнинг улуши 1990 йилдаги 14 фоиздан 2013 йилда 7 фоизгача камайди. Ўта қашшоқликда ёки кунига 1,25 доллардан кам пул эвазига яшовчи аҳоли ҳиссаси эса 1990 йилдаги 10 фоиздан 2010 йилда 4 фоизгача қисқарди.
2000 йилда БМТнинг Мингйиллик саммитида барча давлатлар билан келишилган саккизта Мингйилликнинг тараққиёт мақсадлари ночорлик, очлик, соғлик, гендер тенглиги, таълим ва атроф-муҳит соҳасидаги кўрсаткичларга боғлиқ қатор вазифаларни назарда тутади. Уларнинг кўпчилиги 2015 йил охиригача ҳал этилиши лозим.
Изоҳ (0)