LG G3 оммабопликда Samsung Galaxy S5’ни ортда қолдирди

Жанубий Кореяда Samsung Galaxy S5’га нисбатан LG G3 смартфони кўпроқ сотилаётгани хабар қилинди, деб ёзади Mail.ru. Ушбу қурилма мамлакатда анча оммалашиб кетди.

Нашрнинг таъкидлашича, Жанубий Кореяда сотувга чиқарилганидан бир неча кун ўтиб, 25—30 мингта LG G3 сотилган, бу LG G2’нинг ўтган йилги кўрсаткичидан деярли икки марта ва Galaxy S5’нинг дастлабки савдо ҳажмидан уч марта кўп демакдир.

Айтиш керакки, LG’нинг маркетинг бюджети Кореяда Samsung’никидан анча кам. Бу истеъмолчиларга янги флагман ҳақиқатан маъқул тушганини билдиради.

Эслатиб ўтамиз, янги телефон «ромсиз» дизайн, орқа панелдаги сезиларсиз тугмалар ва силлиқланган металл текстурасига эга.

LG G3 5,5 дюймли 2560×1440 пикселли дисплей, тўрт ядроли Qualcomm Snapdragon 805 процессори, 3 Гб тезкор, 16/32 Гб ички хотира, 13 мегапикселли олд камера ҳамда 3000 mAh сиғимидаги аккумулятор билан жиҳозланган.

27 май куни янги смартфон Сан-Франциско, Нью-Йорк ва Лондонда, бир кундан кейин Сеул, Сингапур ва Истанбулда тақдим этилди.