Бухорода ўрта махсус, касб-ҳунар таълими муассасалари ўқувчилари ўртасида «Сиз қонунни биласизми?» республика кўрик-танловининг мамлакат босқичи бўлиб ўтди. Бу ҳақда ЎзА хабар берди.
«Камолот» ёшлар ижтимоий ҳаракати марказий кенгаши, Ўрта махсус, касб-ҳунар таълими маркази ҳамкорлигида ташкил этилган танловда Қорақалпоғистон Республикаси, вилоятлар ва Тошкент шаҳридан 14 жамоа ғолиблик учун баҳслашди.
– Танловда иштирок этувчиларнинг сони йил сайин ортиб бормоқда. Масалан, 2013 йилда қуйи босқичларда 50 минг нафарга яқин ёш иштирок этган бўлса, жорий йилда бу кўрсаткич қарийб 55 мингга етди, – дейди «Камолот» ёшлар ижтимоий ҳаракати марказий кенгаши раисининг биринчи ўринбосари Ф. Муҳаммаджонова.
Танловда иштирокчиларнинг Ўзбекистон Республикаси Конституцияси, Оила ва Меҳнат кодексларининг ёшларга оид бандлари ҳамда Олий Мажлис ва маҳаллий кенгашларга сайловлар, сайловчиларнинг ҳуқуқлари, аҳолини иш билан таъминлашга оид қонунлар, ҳукумат қарорлари бўйича ҳуқуқий билим даражаси савол-жавоблар орқали аниқланди.
«Ўзбекистон Республикасида ёшларга оид давлат сиёсатининг асослари тўғрисида»ги Ўзбекистон Республикаси қонунининг янги таҳрири лойиҳаси бўйича таклифлар тақдимоти ҳуқуқий билимдонлик кўригида муҳим янгилик бўлди. Танловда жамоалар мазкур лойиҳа бўйича юзга яқин таклифларини намойиш этди.
Бердақ номидаги Қорақалпоқ давлат университети қошидаги 3-академик лицейнинг «Фемида» жамоаси танлов ғолиби, деб топилди. Иккинчи ўринни Бухоро иқтисодиёт ва банк касб-ҳунар коллежининг «Парламент» жамоаси эгаллади. Учинчи ўрин Навоий вилояти, Хатирчи туманидаги агросервис касб-ҳунар коллежининг «Адолат» жамоасига насиб этди.
Шунингдек, турли номинациялар бўйича ғолибликни қўлга киритган жамоалар қимматбаҳо совға ва дипломлар билан тақдирланди.
Изоҳ (0)