Халқ таълими вазирининг буйруғига асосан, якуний давлат аттестациясини ўтказишда, таълим муассасаларини янги ўқув йилига тайёрлашда ўқувчи, битирувчилар ва уларнинг ота-оналаридан пул йиғиши, мактаб ва синф раҳбарлари ёки ўқитувчиларга турли қимматбаҳо совғалар тақдим қилиш, турли тантаналарни хонадонлар, ресторан ёки қаҳвахоналарда ўтказиши қатъиян тақиқланган. Бу ҳақда Ўзбекистон Республикаси Халқ таълими вазирлиги таълим муассасалари фаолиятини ташкил этиш бошқармаси бошлиғи Файзулла Аҳмедов «Оила даврасида» газетасига берган интервьюсида маълум қилди.
— Ўтган ўқув йилидан бошлаб умумтаълим мактабларида ўқув йилининг охирги кунида «Хайр, мактаб — салом, коллеж» тадбирларини ўтказиш яхши анъанага айланди. Бу йил умумтаълим мактабларининг 9-синфини 501 мингдан зиёд ўқувчи битиради. Шу мақсадда 24 май куни бўлиб ўтадиган тадбирларни «Замонавий билимлар билан замонавий касб-ҳунарга эга бўламиз» шиори остида ўтказиш белгиланди. Унда 9-синф битирувчиларини касб-ҳунарга йўналтириш бўйича жамоатчиликни жалб қилган ҳолда ташвиқот ва тарғибот ишлари амалга оширилади, танлаётган касбга бўлган қизиқишлари янада кучайтирилади, — дейди Файзулла Аҳмедов.
Халқ таълими вазирлиги вакилининг таъкидлашича, 9-синф битирувчилари ўзлари танлаган касб-ҳунар коллежи ёки академик лицейга ота-онаси ва ўқитувчилари билан бирга бориб, у ердаги шарт-шароитлар билан танишади.
Изоҳ (0)