Sirdaryodagi davlat idoralarida faoliyat yuritayotgan rahbar xodimlarning savodxonlik darajasini baholash maqsadida o‘zbek tilida diktant olinganda qoniqarsiz natija qayd etilgan.
O‘zbekistonda 2023-yil 1-yanvardan boshlab barcha tashkilotlarda ish yuritish va boshqa hujjatlarni lotin yozuviga asoslangan o‘zbek alifbosida ishlab chiqish, qabul qilish va e’lon qilish to‘liq joriy etilgan. Ushbu qarorning ijrosi Sirdaryoda qay darajada bajarilayotgani viloyat hokimi vazifasini bajaruvchi Erkinjon Turdimov rahbarligida 17-aprel kuni o‘tkazilgan hokimlik soatida muhokama qilingan.
Viloyat hokimligi ishchi guruhi tomonidan o‘tkazilgan o‘rganishlar jarayonida viloyat mahallalar uyushmasi, soliq, sog‘liqni saqlash, iqtisodiyot va moliya boshqarmalari, ayrim tijorat banklari hamda yo‘llardan muntazam foydalanish korxonalarida ushbu qaror ijrosini ta’minlashda kamchiliklarga yo‘l qo‘yilayotgani aniqlangan.
Erkinjon Turdimov davlat idoralarida faoliyat ko‘rsatayotgan rahbar xodimlarning savodxonlik darajalarini oshirish, reklama vositalari birinchi navbatda lotin yozuvi asosida yozilgan bo‘lishi kerakligini aytib o‘tgan.
Davlat idoralarining rahbar xodimlaridan savodxonlik darajasini aniqlash maqsadida diktant olinganda Sog‘liqni saqlash boshqarmasining 9 nafar xodimidan 6 nafari, viloyat “Hududiy elektr tarmoqlari” AJning 5 nafar xodimidan 4 nafari, “O‘ztelekom” AJ Sirdaryo filialining 10 nafar xodimidan 7 nafari, “O‘zbekiston pochtasi” AJ viloyat filialining 8 nafar rahbar xodimidan 4 nafari qoniqarsiz baho olgan.
Ishchi guruh tomonidan aniqlangan kamchiliklarni bartaraf etish bo‘yicha mas’ullarga topshiriqlar berildi. Savodxonlikni oshirish, rahbar kadrlarni bosqichma-bosqich davlat tilida ish yuritish asoslariga o‘qitish va ularni malaka oshirish markazlariga kurslarga jalb etish belgilandi.
Barcha tashkilotlarda ish yuritishda lotin yozuviga asoslangan o‘zbek alifbosiga to‘liq o‘tilishi hukumat qarori bilan belgilangan. Bundan tashqari, markaziy, mahalliy bosma va elektron OAV, internet saytlari, nashriyotlar, matbaa korxonalari faoliyati to‘liq lotin yozuviga asoslangan o‘zbek alifbosiga o‘tkazilishi belgilandi. Shavkat Mirziyoyev 2020-yilda o‘zbek tilini rivojlantirish bo‘yicha 2030-yilgacha mo‘ljallangan chora-tadbirlar to‘g‘risidagi farmonni ham imzolagandi. Hujjat bilan 2020—2030-yillarda o‘zbek tilini rivojlantirish va til siyosatini takomillashtirish konsepsiyasi hamda asosiy yo‘nalishlari tasdiqlandi.
Izoh (0)