Samarqand viloyatining Nurobod tumanidagi bir nechta mahallalarda chigirtkalarga qarshi kimyoviy zararsizlantirish ishlari olib borildi. Bu haqda Qishloq xo‘jaligi vazirligi matbuot xizmati xabar berdi.
Qayd etilishicha, respublika bo‘ylab chigirtkaga qarshi ommaviy kurash ishlari davom etmoqda. Xususan, Samarqand viloyatida ham mavsum boshlangan. Chigirtka va tut parvonasiga qarshi kurash xizmati tomonidan Samarqand viloyatining Nurobod tumanidagi bir nechta mahalla hududida kimyoviy zararsizlantirish tadbirlari olib borilib, murojaatlar o‘rganilmoqda.
Ma’lumot uchun, 2024-yilda respublikada zararli chigirtkalarning 574,8 gektar maydonda kimyoviy ishlov o‘tkazilishi prognoz qilingan. Kuzgi va bahorgi kuzatuvlar natijasida hasharot tuxum qo‘ygan areallar ham ko‘zdan kechirilib, favqulodda vaziyat yuzaga kelishini oldini olish maqsadida kurash choralari olib borilmoqda.
Har bir hudud kesimida amalga oshirilgan ishlar monitoringi yuritilib, xavfli o‘choqlar bartaraf etilishi nazorat ostiga olingan. Zararli chigirtkaga qarshi kurash tadbirlarini olib borish bepul. Aholi murojaatlari 1288 va 71-202-28-88 raqamlari orqali qabul qilinadi, — deyiladi xabarda.
Eslatib o‘tamiz, 2022-yilning may oyida ijtimoiy tarmoqlarda Qashqadaryo viloyatining Dehqonobod tumanidagi ekin maydonlarini chigirtka to‘dasi bosgani aytilgan video tarqalgandi. Keyinroq tuman hokimligi holatga munosabat bildirib, Turkmanistondan kirib kelgan chigirtkalar qishloq xo‘jaligiga zarar yetkazmasligini ma’lum qilgan.
Izoh (0)