“Bavariya”ning 32 yoshli hujumchisi Harri Keyn 2026-yilgi Jahon chempionatidan so‘ng Angliya Premer Ligasiga qaytishi mumkin. Bu haqda The Telegraph nashriga tayanib Championat xabar berdi.
Manbaga ko‘ra, Myunxen klubi hamda futbolchi o‘rtasidagi shartnomada Keynning tovon puli miqdori har yili kamayib borishini nazarda tutuvchi band mavjud. Shuningdek, hujumchining sobiq klubi — “Tottenhem”da uni qayta sotib olish huquqi mavjud. Biroq bu imkoniyat faqat “Bavariya” futbolchini sotishga rozi bo‘lsa va Keynning o‘zi “Tottenhem”ga qaytishni xohlasa amalga oshadi.
Ma’lumot uchun, Harri Keyn 2023-yil yozida “Tottenhem” safidan Germaniyaning eng nufuzli klublaridan biri — “Bavariya”ga o‘tgan edi. Uning shartnomasi 2027-yil yozigacha amal qiladi.
Hujumchi o‘tgan mavsumda “nemis mashinasi” safida jami 51 o‘yinda maydonga tushib, 41 ta gol urgan va 14 ta golli uzatma bergan. Transfermarkt portali futbolchining hozirgi bozor qiymatini 75 million yevroga baholamoqda. U o‘tgan mavsum “Bavariya” bilan Germaniya chempionligini qo‘lga kiritdi. Bu Keynning karyerasidagi ilk sovrin hisoblanadi.
Izoh (0)