Buyuk Britaniyalik olimlar Antarktidadagi 1,5 million yillik muz bo‘laklarini burg‘ilab olib, tadqiqot uchun Kembrijga olib keldi. Bu haqda BBC xabar berdi.
Olimlar ushbu muz bo‘lagini eritish tarixda Yer iqlimi qanday bo‘lgani borasida ma’lumot berishiga ishonch bildirmoqda. Bo‘laklar silindr va to‘rtburchak shakllarda Antarktida muz qatlamining chuqur qismidan burg‘ilab olgan.
“Ushbu muz bo‘laklarida ‘muzlagan’ muhim ma’lumotlar mavjud. Bu iqlim o‘zgarishi haqida mavjud bilimlarga inqilobiy tus beradi”, dedi olimlardan biri.
Muz bo‘laklarini ajratib olish ancha qimmatga tushib, olimlardan ulkan mashaqqat talab qilgan. Muz 1 metr kattalikdagi qismlarga bo‘lingan va qayiqda, keyin esa furgonda Kembrijga olib kelingan.
Olimlar jamoasi 7 hafta davomida qiyinchilik bilan burg‘ilangan muzni asta-sekin eritadi. Undagi qadimiy chang, vulqon kuli va hatto mayda dengiz suv o‘tlari ham tahlil qilinadi. Ushbu materiallar olimlarga 1,5 million yil oldingi shamol, harorat va dengiz sathi haqida ma’lumot beradi.
BBC nashri vakillari muz eritish jarayoniga guvoh bo‘lish uchun Kembrijdagi “Britaniya Antarktika tadqiqoti” muzlatgichiga tashrif buyurgan. Bu yerda harorat selsiy bo‘yicha -23 ni tashkil etadi. Qoidalarga ko‘ra, muzlatgich xonasiga faqat 15 daqiqaga maxsus kombinezon, etik, shlyapa va qo‘lqopda kirishga ruxsat etiladi.
Izoh (0)