Ijtimoiy tarmoqlarda O‘zbekiston davlat san’at muzeyining ta’mir uchun yopilishi ortidan qimmatbaho asarlarning sotuvi boshlangani aytilgan xabarlar tarqaldi.
Manzarachi rassom, rangtasvir ustasi O‘rol Tansiqboyev muallifligidagi surat tarmoqlarda 756 million so‘mga baholangan bo‘lsa, italiyalik rassom asari 37 millionga sotilishi mumkinligi ma’lum qilingan.
Ushbu raqamlar bilan bog‘lanib chiqdim. Birining raqami ishlamayapti, tusholmadim. Biri bu rasm xususiy mulki ekani va Amerikadan auksionda sotib olganini aytdi. Yana biri esa otasi Toshkentda boy inson bo‘lgani va o‘sha vaqti bu rasmlarni sotib olganini tushuntirdi. Hammasi ushbu rasmlarni sotib olsangiz, muammo bo‘lmasligini aytmoqda. Biroq men ishonmadim. Davlatning vakolatli idoralari o‘zi tekshiruv o‘tkazishini so‘rayman, deydi qimmatbaho asarlarga qiziqib ko‘rgan bloger Zafar Solijonov.
Yana bir jamoatchilik faoli, tilshunos, jurnalist va bloger Eldar Asanov qimmatbaho suratlarning internetdagi e’lonlar saytida sotilishini shubhali deb atagan.
Bu holatni, albatta, tekshirish kerak, deydi u.
Madaniy meros agentligi holatga izoh berar ekan, “muzey ta’miri va suratlarning sotuvga chiqishi o‘rtasida bog‘liqlik yo‘q”ligi ma’lum qilindi.
Bildirilishicha, holat o‘rganilgan.
Mazkur holat yuzasidan Madaniy meros agentligi muzey kuratorlari bilan birgalikda yuqorida qayd etilgan san’at asarlarini sinchkovlik bilan ko‘zdan kechirdi. Bu haqdagi tegishli surishtiruv va tushuntirish hisobotlari muzey muhofizlari tomonidan atroflicha qiyosiy o‘rganildi. Suratlar muzey kolleksiyasiga mansub emasligi hamda ularning elektron sotuvga chiqarilishi bilan O‘zbekiston davlat san’at muzeyining rekonstruksiya va joriy ta’mirlash uchun yopilishi o‘rtasida hech qanday bog‘liqlik mavjud emasligini alohida ta’kidlamoqchimiz, deyiladi mas’ullar izohida.
Madaniy meros agentligi axborot xizmati rahbari Mohinur Imomovaning ma’lum qilishicha, O‘zbekiston davlat san’at muzeyining barcha eksponatlari to‘liq raqamlashtiriladi.
Davlat muzeylaridagi elektron identifikatsiya qilinuvchi muzey ashyolari va sara to‘plamlari soni barqaror o‘sishda davom etayotganini ma’lum qilamiz. Hozirda davlat muzeylari fondlaridagi muzey ashyolari to‘plamlari soni 2 525 023 tani tashkil etadi, shundan, 1 815 211 tasi asosiy fondda 709 812 tasi ilmiy-yordamchi fondda saqlanmoqda, 82 067 tasi esa muzey ekspozitsiyalarida namoyish etilmoqda. Fursatdan foydalanib, ijtimoiy tarmoqlarning jamoat ishlarida faol va ta’sirchan foydalanuvchilariga O‘zbekiston davlat san’at muzeyi tomonidan san’at ashyolarini bezavol va bus-butun saqlash masalalariga befarq emasliklari uchun minnatdorchilik izhor qilib, topikstarterlarga o‘zlarining auditoriyasi oldidagi mas’uliyatini his qilgan holda hamda ma’lumot tarqatish odobiga rioya etib, bunday masalalarda shoshma-shosharlikka yo‘l qo‘ymaslikka va muzey yoki vakolatli davlat organi orqali tarqatilayotgan ma’lumot haqiqatga mos kelishi yuzasidan qo‘shimcha o‘rganishga chaqirib qolamiz. Muzeylar tomonidan misqollab yig‘ilayotgan ishonchga va ishchanlik obro‘siga putur yetkazishdan saqlanishni tavsiya etgan holda, kelgusida mamlakatimiz madaniy merosi maskanlari va ashyolariga nisbatan noqonuniy munosabatda bo‘lish holatlari aniqlansa, bu haqda agentlik va huquqni muhofaza qilish organlariga xabar berishlarini so‘rab qolamiz, deydi mas’ullar.
2022-yil Farg‘ona viloyati tarixi va madaniyati davlat muzeyida saqlanayotgan noyob eksponatlar qalbakilashtirilgani, holat yuzasidan jinoyat ishi qo‘zg‘atilgani xabar berilgandi.
Izoh (0)