Prokuratura organlari tomonidan Farg‘ona viloyati tarixi va madaniyati davlat muzeyida sodir bo‘lgan yong‘in holati yuzasidan tergovga qadar tekshiruv o‘tkazilmoqda. Bu haqda Bosh prokuratura matbuot xizmati xabar berdi.
Dastlabki tekshiruvda, 2024-yil 11-aprel kuni mazkur muzeyning ikkinchi qavatida yong‘in kelib chiqishi oqibatida muzey ekspozitsiyasida namoyishga qo‘yilgan XIX asrga oid masjid eshigi hamda qadimiy miltiqning qo‘ndog‘i yonib zararlangani aniqlangan.
Hozirda mutaxassislar ishtirokida tekshiruv harakatlari davom ettirilmoqda, natijalar yuzasidan qonuniy qaror qabul qilinib, qo‘shimcha ravishda maʼlumot beriladi.
“Tekshiruv harakatlari Bosh prokuratura tomonidan nazoratga olingan”, — deyiladi xabarda.
Avvalroq muzey xodimi “Daryo”ga yong‘in natijasida 1850-yillarda yasalgan naqshli masjid eshigi, 1898-yilda Angliya qurolsozlari tomonidan kashf etilgan M-98 rusumli 2 dona miltiq qo‘ndoqlari yongani to‘g‘risida xabar bergandi.
O‘z navbatida Farg‘ona viloyati tarixi va madaniyati davlat muzeyi rahbari Xayrullo Zokirov muzeyda yong‘in emas, qisqa tutashuv bo‘lganini ma’lum qilgan.
Izoh (0)