Rossiya prezidenti Vladimir Putin 1-iyul kuni Fransiya rahbari Emmanuel Makron bilan telefon orqali suhbatlashdi. Bu 2022-yil sentyabridan buyon ikki prezident o‘rtasidagi ilk bevosita muloqot bo‘ldi. Bu haqda Kreml matbuot xizmati xabar berdi.
Muloqot tashabbuskori kim ekani ochiqlanmagan. Davlat rahbarlari Yaqin Sharqdagi vaziyat yuzasidan fikr almashgan. Kreml bergan ma’lumotga ko‘ra, Putin va Makron “Tehronning tinch atom energiyasini rivojlantirish huquqini” hurmat qilish, shuningdek, Yadro qurolini tarqatmaslik to‘g‘risidagi shartnoma doirasidagi majburiyatlarni, jumladan, MAGATE bilan hamkorlikni davom ettirish muhimligini qayd etgan.
Bundan tashqari, tomonlar Ukrainadagi urushni ham muhokama qilgan. Putin yana bir bor qurolli mojaroni “G‘arb davlatlari siyosatining bevosita natijasi” deb atagan. Uning aytishicha, G‘arb “yillar davomida” Rossiyaning xavfsizlik manfaatlarini inkor etib, Ukrainada “Rossiyaga qarshi tayanch hududi”ni shakllantirgan va “rus tilida so‘zlovchi aholining huquqlari buzilishiga ko‘z yumgan”.
Rossiya prezidenti G‘arb davlatlarini “Kiyev rejimini zamonaviy qurollar bilan ta’minlash” orqali “jangovar harakatlarning cho‘zilishiga sabab bo‘layotganlikda” ayblagan. Ukrainada tinchlik o‘rnatish istiqbollari haqida so‘z yuritar ekan, Putin “ehtimoliy kelishuvlarga nisbatan prinsipial yondashuvlarini” tasdiqlagan.
Uning fikricha, bu kelishuvlar “Ukraina inqirozining asl sabablarini bartaraf etish”ni nazarda tutishi va “yangi hududiy voqeliklar”ga tayanishi kerak, deb xabar qiladi Kreml.
Fransiya prezidenti esa muloqotda rossiyalik hamkasbini zudlik bilan o‘t ochishni to‘xtatishga chaqirgan, deb yozadi Le Monde Yelisey saroyiga tayanib.
Makron Fransiyaning Ukraina suvereniteti va hududiy yaxlitligiga qat’iy sodiqligini tasdiqlagan. Putin oxirgi marta 2022-yil 11-sentyabrda Makron bilan telefon orqali muloqot qilgan edi. O‘shanda suhbat fransuz tomonining tashabbusi bilan bo‘lib o‘tgandi.
Ushbu muzokaralarda Ukrainadagi vaziyat yuzasidan “batafsil va ochiq fikr almashilgan”, ayniqsa, Zaporoje atom elektr stansiyasining xavfsizligini ta’minlash masalasi muhokama qilingan. Shuningdek, davlat rahbarlari global oziq-ovqat xavfsizligi mavzusiga ham e’tibor qaratgan. Putin Qora dengiz portlaridan tashilayotgan don, avvalo, rivojlanayotgan mamlakatlar ehtiyojlariga yo‘naltirilishi kerak, deya Moskvaning pozitsiyasini tasdiqlagan.
Izoh (0)