Россия президенти Владимир Путин 1 июль куни Франция раҳбари Эммануэл Макрон билан телефон орқали суҳбатлашди. Бу 2022 йил сентябридан буён икки президент ўртасидаги илк бевосита мулоқот бўлди. Бу ҳақда Кремль матбуот хизмати хабар берди.
Мулоқот ташаббускори ким экани очиқланмаган. Давлат раҳбарлари Яқин Шарқдаги вазият юзасидан фикр алмашган. Кремль берган маълумотга кўра, Путин ва Макрон “Теҳроннинг тинч атом энергиясини ривожлантириш ҳуқуқини” ҳурмат қилиш, шунингдек, Ядро қуролини тарқатмаслик тўғрисидаги шартнома доирасидаги мажбуриятларни, жумладан, МАГАТЭ билан ҳамкорликни давом эттириш муҳимлигини қайд этган.
Бундан ташқари, томонлар Украинадаги урушни ҳам муҳокама қилган. Путин яна бир бор қуролли можарони “Ғарб давлатлари сиёсатининг бевосита натижаси” деб атаган. Унинг айтишича, Ғарб “йиллар давомида” Россиянинг хавфсизлик манфаатларини инкор этиб, Украинада “Россияга қарши таянч ҳудуди”ни шакллантирган ва “рус тилида сўзловчи аҳолининг ҳуқуқлари бузилишига кўз юмган”.
Россия президенти Ғарб давлатларини “Киев режимини замонавий қуроллар билан таъминлаш” орқали “жанговар ҳаракатларнинг чўзилишига сабаб бўлаётганликда” айблаган. Украинада тинчлик ўрнатиш истиқболлари ҳақида сўз юритар экан, Путин “эҳтимолий келишувларга нисбатан принципиал ёндашувларини” тасдиқлаган.
Унинг фикрича, бу келишувлар “Украина инқирозининг асл сабабларини бартараф этиш”ни назарда тутиши ва “янги ҳудудий воқеликлар”га таяниши керак, деб хабар қилади Кремль.
Франция президенти эса мулоқотда россиялик ҳамкасбини зудлик билан ўт очишни тўхтатишга чақирган, деб ёзади Ле Монде Елисей саройига таяниб.
Макрон Франциянинг Украина суверенитети ва ҳудудий яхлитлигига қатъий содиқлигини тасдиқлаган. Путин охирги марта 2022 йил 11 сентябрда Макрон билан телефон орқали мулоқот қилган эди. Ўшанда суҳбат француз томонининг ташаббуси билан бўлиб ўтганди.
Ушбу музокараларда Украинадаги вазият юзасидан “батафсил ва очиқ фикр алмашилган”, айниқса, Запороже атом электр станциясининг хавфсизлигини таъминлаш масаласи муҳокама қилинган. Шунингдек, давлат раҳбарлари глобал озиқ-овқат хавфсизлиги мавзусига ҳам эътибор қаратган. Путин Қора денгиз портларидан ташилаётган дон, аввало, ривожланаётган мамлакатлар эҳтиёжларига йўналтирилиши керак, дея Москванинг позициясини тасдиқлаган.
Изоҳ (0)