Ukraina Oliy Radasi mamlakatning sobiq iqtisodiyot vaziri Yuliya Sviridenkoni Ukraina bosh vaziri lavozimiga tasdiqladi. Bu haqda deputatlar Yaroslav Jeleznyak va Aleksey Goncharenkoga tayanib DW nashri xabar berdi.
Sviridenko nomzodini 262 deputat qo‘llab-quvvatladi, 22 nafar parlament a’zosi qarshi chiqdi, 26 nafari betaraf bo‘lgan, yana 22 deputat bu masalada ovoz bermaslikni ma’qul ko‘rgan.
2020-yil mart oyidan buyon Ukraina hukumatini Denis Shmigal boshqarib kelayotgandi. Avvalroq uning iste’fosi va hukumatning tarqatilishi Oliy Rada tomonidan bir ovozdan ma’qullandi. Ukraina prezidenti Vladimir Zelenskiy 16-iyulda Shmigalni mudofaa vaziri etib tayinlash haqidagi hujjatlarni imzolaganini va Oliy Radaga yuborganini ma’lum qildi.
Zelenskiy yangi hukumat shakllanishi munosabati bilan Radada so‘zga chiqib, AQSH bilan bo‘lajak kelishuvlar haqida bayonot qildi. Unga ko‘ra, bu kelishuvlar “mamlakatni mustahkamlaydi”. Prezident Zelenskiy yangi hukumatga mamlakatda ishlab chiqariladigan qurol va harbiy texnikaning 50 foizini ta’minlash maqsadida amaldagi mudofaa xaridlari bo‘yicha shartnomalarni auditdan o‘tkazishni topshirdi.
Sviridenko kim?
Yuliya Sviridenkoga 39 yoshda. U Chernigovda tug‘ilib o‘sgan, keyinchalik Kiyev Milliy savdo-iqtisodiyot universitetini tamomlagan. 2019-yildan boshlab Sviridenko Iqtisodiyot vazirligi rahbariyatida faoliyat yuritgan.
2020-yil dekabr oyida u prezident devoni rahbari Andrey Yermakning o‘rinbosari bo‘ldi. 2021-yil noyabr oyida esa u iqtisodiyot vaziri va Ukraina birinchi vitse-premeri lavozimiga tayinlandi. Sviridenko AQSH bilan resurslarga doir bitim yuzasidan muzokaralar olib borgan va bu kelishuvni aprel oyida Ukraina nomidan imzolagan.
Izoh (0)